La cuschinetta cun las regurdientschas da Marietta
Avon varga 500 onns viveva in um, il qual purtava il num Gion Flurin.
Dapi il mortori da sia cara dunna Marietta nega el en larmas da tristezia. El ha piars il senn dalla veta. Sia lavur ei stufia e greva. Il sulet ch‘el po aunc far la sera ei seser en sia cuschinetta e patertgar vid sia Marietta. In di pren el ina butteglia vinars ord scaffa ed entscheiva a beiber. Siu beiber peglia buca fin. Tut stuorns va el ord casa. El va in toc da via si, piarda la pesentincla e schula sin in crap. Avon che Gion Flurin vegn senza schientscha vesa el aunc in’umbriva che va sper el ora. In clar radi dil sulegl sclarescha dalla finiastra en, tochen tier siu letg. Cun mal il tgau mira el entuorn. El va giu en la cuschinetta e vesa Marietta che sesa vid la meisa. Ella di: „Miu car fai mai pli da quei! Accepta tia veta sco ella ei, jeu sun adina cun tei!“ Gest en quei mument va Marietta e Gion Flurin accepta sia veta sco ella ei.
