I d‘eira üna jada ün orolger da Zernez. Quel stuvaiva ir sur il Fuorn a furnir sias uras. Adonta da la plövgia e da las fradaglias as vaiva‘l miss in viadi.
I plovaiva a tschêl ruot! Clitsch pantan as vaiva‘l fermà sü Süssom Givè per ir a baiver ün cafè e per as s-chodar ün zich. Cun nouvas forzas vaiva‘l cuntinuà seis viadi giò dal Pass da Fuorn vers la Val Müstair. Aint in üna da las stortas sechas s‘ha‘l inaccort cha seis frains nu tegna plü. Che anguoscha!
E bain co mal vaiva‘l fat üna schgniffada terribla ch‘el vezzaiva a glüschir las stailas e dudiva a tschüblas ils utschels!
Quai es stat seis ultim viadi sur il Fuorn cun quist s-chierp terribel, daspö là as vaiva‘l construi ün velo cun penna, blerun plü stabil e cun frains da schaibgia! Bod co ün da quels moderns dad hozindi. El sarà stat quel chi ha inventà il prüm Fully.
