I d‘eira ün di da plövgia. Ün simil di vegn eu jent sün plantschin a svutrar. E che n‘ha eu chattà? Per baco! Ün schluppet antikischem, fich ün bel e grond.
Meis bap ha dit cha cun quel schluppet haja‘l meis bazegner sajettà ün uors.
Che battorsta cha quai d‘eira stat dal 1802 aint in S-charl. Quia as tratta dad ün schluppet da chatscha cun chonna dubla e battafö, cun quels daiva adüna problems. Il tun nu partiva adüna! Eir quella jada cha bezegner d‘eira per sajettar l‘uors nu laiva partir il tun. Il uors as vaiva miss süllas chommas davo e sbrüjiva a tuot pudair. Meis tat vaiva tschüf la pel giallina e chommas tremblontas. Cun grond curaschi as vaiva‘l miss incunter al uors cul schluppet in man. Uschè d‘eira il uors mort d‘ün cuolp giò per la creppa! Che festa cha quai vaiva dat aint in S-charl cur cha tat d‘eira rivà cul uors in cumün. Be il guardgiachatscha squassaiva il cheu e marmuognaiva aint per sia barba: „La chatscha es daspö ün‘eivna passada!“ Quai chi d‘eira capità in seguit es ün‘otra istorgia e quella nu laina tradir
