Valischs
Valischs portats la daman a bunura
giò tar la staziun.
Nu badan
l’agitaziun, l’aspettativa, l'algrezcha
e’l plaschair d’ir a Zuoz,
la temma, cha’l bap resta sül perrun
dürant las trais müdadas da tren,
là spordschen vendaders bavondas
e mangiativas avant la fanestra dal tren,
e’ls fachins chi spettan sün lavur.
Nu san
da chenüna plazza a la fanestra
as vezza il lai da Turich,
cha la retica
squassa amo dapü sco la VF
ni cha'ls guots da Zeller nu güdan cunter
il malesser dal stomi,
da la lungurella
da’l viadi, bod sainza fin,
sco cha las valladas dvainten adüna plü strettas
e'ls tunnels adüna plü lungs.
Nu spettan
il davomezdi sül clam “Piz d’esen!”
e süls bütschs da nona e bazegner,
ni sün la stüva cun la maisa fatta pronta,
cul servezzan da tè fin, giapunais,
tuorta melna, grassins, pannins
e sül baderlöz, e’l masdügl
da vuschs chi raquintan.
Objekt: Dal 1846 dvantaiva Laufen il lö principal dal district. La pesanta chaista da fier d’eira il tresor dal tresorier. Sco’l tresor cuntegna eir la valisch las robas las plü preziusas.
