Chi ho serro la porta, aunz cha tuot ils visitadurs sun sortieus? Eau nu vögl passer la not suletta in Chesa Planta, quista chesa ün poïn sula!
Not s-chüra, üngüna glüsch. Che es que? Ün schuschuri, ün bisbiglier… ün spiert?
“Chi es tü?”, sbregi – bain, sbragir es pü cu facil exagero, que tuna püttost scu üna scongüra. Precis, eau drouv qualchosa per scongürer ils spierts, ün amulet… Inua vaivi vis quel parasol? Sgür ch’el funcziuna eir scu paraspierts!
Luot luottin vegni a palp. Dandettamaing vezzi in luntaunanza üna fina glüschür blova. Que es mieu paraspierts!
Svelt m’avicini, aintr illa staunza e zaf quella masdina miraculusa, mieu salvamaint! Uossa am sainti sgüra, la temma es svanida. Resolutamaing vegni ingiò, il paraspierts glüschaint am sclarescha mincha s-chelin.
A la fin vezzi la porta. Ma… ella es spalancheda! Eau poss sortir! Ma… eau nu vögl purter cun me il paraspierts, l’invuler. Sainza refletter tuorni inavous sü da s-chela e’l poz darcho in sia staunza.
Sgritsch… clac… eau od cu cha cugiò as serra la porta…
Oggetto: Il parasol da l'exposiziun "Splendur e sumbriva" in Chesa Planta a Samedan es dal 19evel tschientiner e consista da duos vettas da saida chi zuoglian la construcziun.
