Anno domini 1465 ei il Signur Candrian da Razén vegnius si Trun pil Bundstag. Sco adina ha el survegniu in truchet ella stiva digl avat. Staunchels dil viadi ha el gest mess tut ses documents el truchet.
La miur Barla ei selegrada fetg da quei. Finalmein ha ella survegniu niev material per sias furbarias. Cun grond plascher e spetga ha ella entschiet a leger. In pauper pur da Domat, condemnau alla mort, ha tschaffau l'attenziun da Barla. Ella veva cumpassiun cun el, pia ha ella vuliu midar siu destin. Lu ha Barla priu sia cua enta maun e mess ella el tentaschier. Fetg hurti e habel ha ella midau il num dil pur per in signur.
Il pur da Domat ha mai capiu daco ch'el seigi vegnius amnestaus. Ed igl avat da Mustér ha benediu la Barla.